Nanguna ang Bangsamoro Autonomous Region in Muslim Mindanao (BARMM) sa pinakataas nga vaccination coverage sa Mindanao, nga miabot sa 91 porsyento, human mabakunahan ang 523,324 ka mga bata atol sa Measles-Rubella Supplemental Immunization Activity (MR-SIA), sumala sa usa ka health official niadtong Miyerkules, Marso 11.
Ang kampanya gipahigayon gikan Enero 19 hangtod Pebrero 24.
Sumala ni BARMM Ministry of Health Minister Dr. Kadil Sinolinding, ang Maguindanao del Norte, Cotabato City, Tawi-Tawi, ug Lanao del Sur maoy nakarekord sa pinakataas nga vaccination coverage sulod sa rehiyon, samtang ang Basilan maoy adunay pinakubos nga coverage.
Milabaw ang coverage sa BARMM kumpara sa ubang rehiyon sa Mindanao. Gisundan kini sa Caraga Region nga adunay 87 porsyento coverage ug 234,923 ka bata ang nabakunahan.
Ang Zamboanga Peninsula ug Northern Mindanao parehong adunay 86 porsyento coverage. Ang Soccsksargen nakarekord og 78 porsyento, samtang ang Davao Region maoy adunay pinakubos nga turnout nga 65 porsyento.
Nagpasalamat si Sinolinding sa mga health workers tungod sa kalampusan sa kampanya.
Matud pa niya, dako ang kontribusyon sa panaghiusa, dedikasyon, ug walay kapoy nga serbisyo sa mga health workers sa pagpanalipod sa kahimsog sa mga kabataan.
Ang MR-SIA campaign nagtumong sa pagbakuna sa mga 2.5 milyon ka mga bata nga nag-edad og unom ka bulan hangtod 59 ka bulan sa tibuok Mindanao aron maprotektahan sila batok sa measles ug rubella.
Bisan human sa kampanya, padayon gihapon ang vaccination services sa BARMM. Giawhag ni Sinolinding ang mga ginikanan nga dad-on ang ilang mga anak sa pinakaduol nga Rural Health Unit (RHU) aron mabakunahan.
Nakab-ot usab sa BARMM ang 87 porsyento nga coverage sa Vitamin A supplementation alang sa mga kwalipikadong bata atol sa maong kampanya.
Source: SanStar Publishing Inc.