Narekober ang 13 ka high-powered firearms sa gipahigayon nga clearing operations sa mga otoridad sa border areas sa Barangay Lomopog, Midsayap, North Cotabato ug sa Nabalawag, nga karon bahin na sa Bangsamoro Autonomous Region in Muslim Mindanao niadtong Miyerkules, Marso 11, 2026.
Sumala ni Police Brigadier General Jaysen C. De Guzman, Regional Director sa PRO BAR, ang hinungdan sa kagubot mao ang “rido” o clan feud nga gikalambigitan ni Nabalawag Mayor Renz Tukuran, usa ka lokal nga lider nga nailhan nga Commander Kutay, ug ang ikatulo kay ang wala pa mailhing armadong grupo.
Narekober sa operasyon ang M16, M14, M1 Garand, ug U-M4 rifles, K3 machine guns, mga bala, ug pampasabog.
Nahibal-an nga unom ka sibilyan ang napatay ug lima ang nasamdan nga nagresulta sa pagbakwit sa 7,500 ka sibilyan nga kasamtangang nagpuyo sa Lomopog Elementary School, Midsayap Municipal Hall, ug Nabalawag Community Center.
Nagpadayon ang pagpaniguro sa seguridad ug kaluwasan sa matag lungsoranon pinaagi sa PNP ug AFP aron makab-ot ang kalambuan.