Nasamdan ang upat ka indibidwal human sa nahitabong pagpamusil sulod sa Central Pilot Elementary School sa Sinsuat Avenue, Poblacion 6, Cotabato City, alas-6:45 sa buntag karong Setyembre 14, 2026.
Lakip sa mga biktima ang usa ka personnel sa Philippine National Police nga naigo sa bala sa tiil. Wala pa gipagawas ang iyang pagkatawo.
Tulo pa ka indibidwal ang nasamdan, apan padayon pa ang beripikasyon sa ilang pagkatawo ug posibleng affiliation.
Base sa inisyal nga impormasyon, pipila ka mga buto sa armas ang gipabuto sa wala pa mailhing armadong suspek o mga suspek sulod mismo sa eskwelahan.
Dali usab nga mitubag ang mga personnel sa Quick Reaction Force ug gisira ug gisiguro ang maong lugar.
Gidala sa Cotabato Regional and Medical Center ang mga nasamdan alang sa dihadiha nga medical attention.
Naglunsad usab ang mga awtoridad og pursuit ug interdiction operations alang sa posibleng pagkadakop sa suspek o mga suspek.
Samtang, wala pa matino ang motibo sa pagpamusil. Padayon ang imbestigasyon ug intelligence validation sa mga awtoridad aron mailhan ang mga suspek ug matino ang tibuok panghitabo sa insidente.
Ang Central Pilot Elementary School nahimutang mismo sa atbang sa Police Station 1 sa Cotabato City.
Source: Koronadal