Nasakmit sa mga tropa sa militar ang mga armas nga taas og kalibre, eksplosibo ug uban pang kagamitang panggubat human sa managlahing engkwentro batok sa mga gituohang miyembro sa communist terrorist group o CTG sa T’boli, South Cotabato.
Nahitabo ang unang engkwentro pasado alas-8:20 sa buntag kagahapon, Setyembre 14, sa Sitio Lebe, Barangay Tudok.
Sumala sa 6th Infantry Division ug Joint Task Force Central, nakasagupa sa mga tropa sa 105th Infantry Battalion ang gibanabanang napulo ka armadong rebelde nga giingong sakop sa Regional Operations Command sa Far South Mindanao Region.
Miadto og mga napulo ka minuto ang engkwentro sa wala pa miatras ang armadong grupo.
Sa gihimong clearing ug pursuit operation, nakarekober ang mga sundalo og 40mm grenade launcher, caliber .38 revolver, mga communication equipment, cellphone, medical kit ug pipila ka dokumento.
Mikabat na usab ang engkwentro pagsalop sa adlaw sa maong lugar.
Niining higayona, nakarekober ang mga tropa og M16 rifle, anti-personnel mine, granada, mga magazine, bandolier, radyo, binoculars, mga bag ug uban pang kagamitan.
Sumala kang Acting 6ID ug JTFC Commander Brigadier General Ricky Bunayog, dakong kapildihan alang sa armadong grupo ang maong operasyon.
Gidasig usab sa militar ang mga nahibiling armadong miyembro sa grupo nga itugyan ang ilang mga armas ug pahimuslan ang higayon nga makabalik-loob sa gobyerno.
Samtang, gipasalig sa 6ID ug JTFC nga magpadayon ang ilang mga operasyon aron mapadayon ang seguridad ug kalinaw sa mga komunidad.