Mas sayon ug mas kasaligan na ang pag-access sa limpyo ug luwas nga tubig sa mga residente sa Sitio Ihan, Barangay Datal Anggas, Alabel, Sarangani Province pinaagi sa Spring Development Project nga gipatuman sa Department of Environment and Natural Resources (DENR).
Tumong sa proyekto nga mapanalipdan ang lokal nga tinubdan sa tubig nga gilauman makasuplay og tubig sa kapin 100 ka panimalay ug makatubag sa ilang adlaw-adlaw nga panginahanglan.
Kabahin usab sa proyekto ang pag-instalar og walo ka tap stands aron mas mapaayo ang access sa mga residente sa limpyo ug luwas nga tubig. Padayon nga gipasiugda sa DENR ang malungtarong pagdumala sa natural nga kahinguhaan ug paghatag og importanteng serbisyo ngadto sa mga komunidad nga nahimutang sa geographically isolated areas.
Niadtong Septiyembre 11, mibisita sa Barangay Datal Anggas ang DENR Region 12, uban sa Philippine Information Agency (PIA) ug mga key media partners, aron inspeksyunon ug subayon ang nahuman nang proyekto.