Padayon nga ginapalig-on sa Gobyerno Probinsyal sa Zamboanga del Sur ang akses sa de-kalidad nga edukasyon sa kolehiyo pinaagi sa pagtunol sa bag-ong duha-ka-andana nga mga classroom building sa Zamboanga del Sur Provincial Government College (ZDSPGC) campuses sa Mahayag ug Tabina.
Usa ka building nga nagkantidad og ₱14.8 milyon ang gitunol sa ZDSPGC Mahayag Campus, nga nagpaayo sa kahimtangan sa pagkat-on ug nakahatag og luna alang sa mas daghang estudyante gikan sa silingang mga lungsod. Laing duha-ka-andana nga building nga nagkantidad og ₱19.7 milyon ang gitunol sa ZDSPGC Tabina Campus aron masulbad ang kakulang sa mga classroom ug aron makahimo og mas angay ug komportable nga palibot sa pagkat-on.
Giawhag ni Gobernadora Divina Grace Yu ang mga estudyante nga magpadayon sa ilang pag-eskwela, nga nagpasabot nga ang edukasyon usa ka importante nga pundasyon sa pagpataas sa kahimtangan sa pamilya ug komunidad. Matod pa sa lokal nga mga opisyal, dako kaayo ang tabang sa maong mga proyekto sa pagpalapad sa akses sa edukasyon, ilabi na sa mga estudyante nga nagpuyo sa mga hilit nga lugar.
Gipadayag usab ni Second District Representative Victoria Yu ang iyang pag-abiabi ug pag-congratulate sa school community, ug iyang gi-emphasize ang kahinungdanon sa pag-invest sa edukasyon alang sa kabatan-onan.
Pinaagi niining mga proyekto, nagpadayon ang Gobyerno Probinsyal sa Zamboanga del Sur sa iyang adbokasiya alang sa inklusibo ug de-kalidad nga edukasyon, tumong ang pagpalig-on sa mga estudyante ug pag-andam og usa ka mas abtik, may-kahanas, ug lig-on nga future workforce sa probinsya.