Wala nakapugong ang pagbunok sa kusog nga ulan sa pag-sugod sa Davao Region Athletic Association (DAVRAA) Meet adtong Pebrero 22, 2026 nga gipahitabo sa Davao del Norte Tourism and Sports Complex, Barangay Mankilam, Tagum City, Davao del Norte.
Anaa sa lampas sa 9,000 ka atleta, coaches ug technical staff gikan sa 11 ka Schools Division sa DepEd ang mingsalmot sa tinuig nga padula sa Rehiyon Onse, nga mulungtad hangtod Pebrero 28, 2026.
Kini na ang ika-duhang tuig nga sagunsong gipahigayon ang DAVRAA sa siyudad sa Tagum, diin gipahitabo usab kini sa niaging tuig.
Gipangunahan ang 2026 DAVRAA Meet sa DepEd Region XI ug Davao del Norte Provincial Government, sa pakigtambayayong sa co-host niini nga City Government of Tagum.
Kini kabahin sa pagpangandam sa mga atleta sa rehiyon alang sa umaabot nga 65th Palarong Pambansa nga pagahitabuon sa Agusan del Sur sa Mayo.
