Nasamsam sa kapulisan ang ginatayang P16,120,000 nga kantidad sa ginadudahang smuggled nga sigarilyo gikan sa tulo ka abandonadong trak sa Lanao del Sur niadtong Abril 21, 2026.
Sumala sa report, ang mga sakyanan nga naglangkob sa usa ka puti nga Isuzu Elf, usa ka orange nga Isuzu Elf, ug usa ka maroon nga Mazda Titan, nadiskobrehan sa Brgy. BPS Village, Malabang nga walay susi ug walay kaukulang dokumento.
Sa masusing inspeksyon, nasuta nga ang sulod sa mga trak gitabonan og mga niyog aron itago ang kinatibuk-ang 403 ka master cases sa mga sigarilyong Berlin ug Canon. Gituohan nga kini iligal nga gi-smuggle, nga nagpakita og dakong paglapas sa balaod.
Dayon nga miresponde ang mga kapulisan sa Malabang Municipal Police Station (MPS), uban ang koordinasyon sa 2nd Provincial Mobile Force Company (PMFC) sa Lanao del Sur Police Provincial Office (PPO), Provincial Intelligence Unit (PIU), ug dugang seguridad gikan sa 41st Special Action Company (SAC) ug 4th Special Action Battalion (4SAB).
Ang mga nakumpiskang sigarilyo ug uban pang ebidensya anaa na sa kustodiya sa Malabang MPS alang sa hustong dokumentasyon ug disposisyon, ug ipasa sa ulahi sa Bureau of Customs.
Gidayeg ni PBGEN Jaysen C. De Guzman, Regional Director sa PRO BAR, ang mga operating unit tungod sa ilang padayon nga paningkamot batok sa smuggling nga adunay dakong epekto sa ekonomiya sa nasud.
Source: StarFM Cotabato