Nagpadayon ang mga operatiba sa General Santos City Police Office ug uban pang responder agencies sa search and rescue operations human sa kusog nga linog nga mitay-og sa Mindanao karung adlawa, Lunes, Hunyo 8, 2026.
Ang mga kapulisan gipakatap sa nagkalain-laing lugar aron motabang sa paglikas sa mga residente, pag-assess sa kadaot, ug pagpangita sa mga posibleng biktima nga naapektuhan sa insidente.
Sumala sa mga inisyal nga report, adunay mga estruktura nga naguba ug mga lugar nga gi-inspeksyon sa mga awtoridad aron masiguro ang kaluwasan sa publiko. Ang mga search and rescue teams nagpadayon sa ilang operasyon samtang ginaberipika pa ang tibuok kahimtang sa syudad ug sa mga kasikbit nga lugar.
Gihangyo sa GenSan PNP ang publiko nga magpabiling alerto ug mosunod sa mga advisories sa lokal nga kagamhanan ug disaster response agencies. Gidasig usab ang mga residente nga likayan ang mga bilding nga adunay kadaot tungod sa posibilidad sa aftershocks.