Misamot ang tensyon atol sa usa ka rally sa kaolohan human ang pipila ka mga raliyista giingong nahimong agresibo ug miguba sa mga barikadang gipahimutang sa mga awtoridad aron mapadayon ang kahapsay ug kaluwasan sa maong kalihokan.
Base sa inisyal nga mga report, naningkamot ang mga raliyista nga makaduol sa lugar nga gi-restrikto sa kapulisan sa Kalaw St., Ermita, Manila mahitungod sa pagsaulog sa 128th Independence Day, karung Biyernes, Hunyo 12, 2026. Tungod niini, nagdusoay ug nagbanggaay ang pipila ka mga demonstrador ug mga miyembro sa kapulisan sa palibot sa barikada.
Bisan pa sa nahitabong tensyon, gipadayon sa PNP ang pagpatuman sa ilang polisiya sa “maximum tolerance.” Nagpasabot kini nga likayan sa mga kapulisan ang paggamit og dili kinahanglan nga pwersa ug unahon ang pagpakalma sa sitwasyon pinaagi sa dayalogo ug maayong pagdumala sa panon.
Matud pa sa mga awtoridad, ilang gitahod ang katungod sa matag lungsoranon sa pagpahayag sa ilang baruganan ug pagbuhat og malinawon nga pagprotesta. Apan ilang gipahinumdoman ang tanan nga kinahanglan gihapon nga sundon ang balaod ug likayan ang mga lihok nga mahimong hinungdan sa kadaot sa kabtangan ug peligro sa publiko.
Nag-awhag ang PNP sa tanang sektor nga magpabiling kalmado ug magtinabangay aron mapreserbar ang kahapsay ug kalinaw sa komunidad samtang ginatuman ang kagawasan sa pagpahayag ug pagprotesta.
Photos by: Tambayan ng Pulis