Gisugdan na sa Commission on Elections (COMELEC) ang pag-dispose o pagguba sa kinatibuk-ang 2,420,904 ka opisyal nga balota nga una nang naimprenta alang unta sa napostpone nga Bangsamoro Autonomous Region in Muslim Mindanao (BARMM) Parliamentary Elections.
Sumala sa COMELEC, ang maong mga balota gitago sa ilang bodega sa Biñan ug kinahanglan nang hingpit nga gub-on aron masiguro nga dili na kini magamit sa bisan unsang paagi. Ang maong lakang gihimo aron mapreserbar ang integridad, seguridad, ug kredibilidad sa proseso sa eleksyon subay sa naglungtad nga mga lagda ug polisiya sa Komisyon.
Hinumdoman nga ang mga balotang kini gitagana unta alang sa eleksyon nga gikatakdang ipahigayon niadtong Oktubre 13, 2025, apan wala madayon tungod sa pag-postpone sa maong piniliay.
Samtang nagpadayon ang pagguba sa mga daang balota, gipahibalo usab sa COMELEC nga andam na ang bag-ong disenyo sa balota alang sa umaabot nga BARMM Parliamentary Elections nga gikatakdang ipahigayon sa Setyembre 14, 2026.
Lakip sa bag-ong balota ang updated nga listahan sa mga political party ug mga kandidato nga misumite sa ilang Certificate of Candidacy (COC) gikan Mayo 5 hangtod Mayo 7, 2026. Kabahin kini sa mga pagpangandam sa COMELEC aron masiguro ang usa ka malinawon, organisado, ug patas nga proseso sa eleksyon sa rehiyon.