Nagmalampuson ang gipahigayon nga Nutrition Symposium 2026 alang sa mga kabatan-onan niadtong Hulyo 13, 2026, sa Youth Hub sulod sa City Gymnasium and Cultural Center sa Dakbayan sa Valencia.
Nagdala ang kalihokan sa tema nga “A Learning Session on the Connection Between Nutrition, Environmental Protection, and Climate Action,” nga nagtumong sa pagpalawom sa kahibalo sa mga kabatan-onan kabahin sa kalambigitan sa hustong nutrisyon, pagpanalipod sa kalikupan, ug aksyon batok sa epekto sa pagbag-o sa klima aron mapalig-on ang mapatunhayong sistema sa pagkaon.
Giorganisar ang symposium sa City Nutrition Committee ug City Youth Development Office, uban sa suporta sa administrasyon ni City Mayor Amie Galario ug sa ika-10 nga Sangguniang Panlungsod nga gipangulohan ni Vice Mayor Greizl Galario-Fernandez.
Gisugdan ang kalihokan pinaagi sa pulong pag-abiabi ni City Nutrition Action Officer Hazel Dondonayos, RND, MGA. Gisundan kini sa pakigpulong ni City ENR Officer Julius Parian, nga nagtuki sa kamahinungdanon sa pagpanalipod sa kalikupan aron mapadayon ang lig-on nga sistema sa pagkaon.
Gihatagan usab og kahibalo ang mga partisipante ni Senior Agriculturist Rhea Jean Rodriguez kabahin sa climate-smart agriculture, nga nagpunting sa mga pamaagi sa agrikultura nga makasugakod sa mga hagit nga dala sa pagbag-o sa klima samtang nagpadayon ang produksyon sa pagkaon.
Samtang, gipasabot ni Nutrition Program Coordinator Julie Ann Brigoli, RND, LPT ang kahinungdanon sa pagpili og himsog ug husto nga mga pagkaon isip kabahin sa pagmintinar sa maayong panglawas ug pagpalambo sa kalidad sa kinabuhi.
Gitapos ang symposium pinaagi sa pagpanghatag og mga sertipiko sa mga partisipante ug sa panapos nga mensahe gikan ni Guia Mae A. Rubio, RND, nga nagdasig sa mga kabatan-onan sa pagpadayon sa mga maayong binuhatan alang sa nutrisyon, kalikupan, ug mapatunhayong kalamboan.
PIAD | Jessa Heroche
Photos: Carl Tradz