Nagpatuman og pwersahang pagbakwit ug rescue operations ang lokal nga panggamhanan sa Ampatuan, Maguindanao del Sur, sa tulo ka barangay human misaka ang lebel sa tubig ug misamot ang hulga sa pagbaha tungod sa padayong pag-ulan.
Gipatuman ang operasyon niadtong Hulyo 24 sa Barangay Malatimon, Kapinpilan, ug Kakal ubos sa mando ni Ampatuan Mayor Datu Rasul M. Sangki.
Gipangulohan sa Municipal Disaster Risk Reduction and Management Office (MDRRMO), ubos sa pagpanguna ni Rhea Tiemsem-Martin, ang operasyon uban sa Disaster Search and Rescue Team, Charlie Coy, 90th Infantry Battalion, PNP-Ampatuan Station, ug Bureau of Fire Protection (BFP)-Ampatuan.
Matud sa MDRRMO, ang pwersahang pagbakwit gitumong aron maseguro ang kaluwasan sa mga residente nga nagpuyo sa mga lugar nga taas og risgo tungod sa padayong pagsaka sa tubig ug posibleng pagbaha.
Nanawagan usab ang lokal nga panggamhanan sa mga residente, ilabi na kadtong nagpuyo sa mga ubos nga lugar ug flood-prone areas, nga makigtambayayong sa mga otoridad ug dayong mosunod sa mga evacuation advisory aron malikayan ang posibleng kadaot ug peligro.
Nagpasalamat usab ang LGU Ampatuan sa tanang responders ug partner agencies nga padayong naghatag og paspas nga pagresponde aron maseguro ang kaluwasan sa mga apektadong residente.