Wala’y namomonitor nga bisan unsang security threat ang Philippine National Police (PNP) kalabot sa State of the Nation Address (SONA) 2026 ni Presidente Ferdinand R. Marcos Jr. karong Lunes, Hulyo 27.
Bisan pa niini, nagpabiling alerto ang PNP aron masiguro ang seguridad ug mapadayon ang malinawon ug hapsay nga pagdumala sa tinuig nga kalihokan. Matud ni PNP Chief Police General Jose Melencio Nartatez Jr., igo na ang gidaghanon sa mga personnel ug gikinahanglang resources nga nakapwesto na sa mga lugar nga may kalabotan sa SONA.
Kapin 20,000 ka mga police officer ang ideploy sa nagkadaiyang bahin sa Metro Manila aron masiguro ang seguridad, ilabina sa mga importanteng dalan ug mga lugar nga gilauman nga mahimong kabahin sa kalihokan. Nakigtambayayong usab ang PNP sa ubang mga ahensya sa gobyerno sa pagpatuman sa mga lakang sa seguridad aron masiguro ang malinawon ug hapsay nga pagdumala sa SONA 2026.
“We all have the same goal of ensuring a peaceful and orderly SONA, and we all have the same commitment to deliver,” pahayag ni PGen. Nartatez Jr., isip pagpasalig sa kahandaan sa PNP ug sa mga kaabag nga ahensya sa pagmintinar sa seguridad atol niining importante nga nasudnong kalihokan.