Luwas nga nasagip sa Philippine Coast Guard (PCG) ang 62 ka tawo nga sakay sa Motor Launch (M/L) TRISHA MAE human kini nakaeksperyensya og problema sa makina samtang nagbiyahe gikan sa Bongao padulong sa Mapun, Tawi-Tawi niadtong Hulyo 27.
Base sa taho, 52 ka pasahero ug 10 ka tripulante ang sakay sa maong sakyanang-dagat. Dali nga nagpahigayon og search and rescue operation ang Coast Guard Station Central Tawi-Tawi, uban sa Coast Guard Sub-Station Bongao, SOG-CTT, ug MEPU, human makadawat og impormasyon kabahin sa insidente.
Nasubay sa rescue team ang M/L TRISHA MAE ug luwas kining giguyod balik ngadto sa Port of Bongao. Ang tanang sakay sa bangka luwas nga naabot sa pantalan ug anaa sa maayong kahimtang. Wala usab may naitalang namatay o nasamdan sa maong insidente.
Matod sa PCG, ang malampusong rescue operation nagpakita sa ilang kanunay nga kahandam ug paspas nga pagtubag sa mga emerhensiya sa kadagatan.
Sa samang higayon, gipahinumdoman sa PCG ang mga operator sa mga sakyanang-dagat ug mga pasahero nga siguruhon nga anaa sa maayong kondisyon ang mga barko ug bangka sa dili pa mobiyahe aron malikayan ang susamang insidente ug mapanalipdan ang kaluwasan sa tanan.
Source: StarFM Cotabato