Giluwas sa Philippine Coast Guard (PCG) ang unom ka pasahero human matumba ang ilang gisakyan nga motor banca sa kadagatan sa Barangay Pura, Datu Blah Sinsuat, Maguindanao del Norte niadtong Hulyo 29.
Sumala sa PCG, dihadiha silang nagpahigayon og search and rescue operation human makadawat og report gikan sa usa ka concerned citizen kabahin sa insidente.
Base sa inisyal nga imbestigasyon, nagbiyahe ang motor banca gikan sa Barangay Pura padulong sa Barangay Nalkan apan nadaot ang wala nga katig niini tungod sa kusog nga mga balod, nga maoy hinungdan sa pagkatumba sa bangka.
Maluwas nga nasagip ang tanang unom ka pasahero ug gidala dayon sa Rural Health Unit alang sa medical assessment. Human masusi sa mga doktor, gitugotan silang makauli tungod kay nahibaloang maayo ug luwas ang ilang kahimtang sa panglawas.
Gidayeg ni PCG Commandant Admiral Ronnie Gil L. Gavan ang paspas ug hapsay nga pagtubag sa mga Coast Guard personnel sa maong insidente.
Matud sa PCG, ang malampusong rescue operation nagpamatuod sa padayon nga paningkamot niini sa pagpanalipod sa kaluwasan sa mga naglawig sa kadagatan pinaagi sa paspas ug kasaligan nga pagtubag sa mga maritime emergency.
Source: StarFm Cotabato