Nasakmit sa Philippine Drug Enforcement Agency Regional Office 9 (PDEA RO9) ang gibanabanang ₱680,000 nga balor sa gidudahang shabu ug nadakpan ang usa ka mag-uuma sa buy-bust operation nga gihimo sa Barangay Tiguma, Pagadian City kagahapon, Agosto 3.
Giila sa mga awtoridad ang suspek nga alyas “Datz,” 33 anyos, minyo, ug residente sa Barangay Payong, Sultan Naga Dimaporo, Lanao del Norte.
Gipangulohan ang operasyon sa PDEA Zamboanga del Sur Provincial Office uban sa Philippine National Police–Zamboanga Sibugay Provincial Intelligence Team, Regional Intelligence Unit 9, Regional Drug Enforcement Unit 9–Zamboanga del Sur, ug 902nd Maneuver Company sa Regional Mobile Force Battalion 9.
Nakumpiska gikan sa suspek ang gibana-banang 100 gramos sa gidudahang shabu nga adunay gibanabanang standard market value nga ₱680,000. Narekober usab sa mga operatiba ang usa ka motorsiklo, cellphone, buy-bust money nga adunay tinuod nga ₱1,000 nga bill, mga plastic packaging materials, paper bag, ug identification card sa suspek.
Gihimo ang imbentaryo ug dokumentasyon sa mga nakuhang ebidensya atubangan sa mga representante sa Department of Justice, media, ug usa ka halal nga opisyal, subay sa mga probisyon sa Republic Act No. 9165 o Comprehensive Dangerous Drugs Act of 2002.
Giatubang sa suspek ang kasong paglapas sa Section 5, Article II sa Republic Act No. 9165 kalabot sa pagbaligya og ilegal nga droga.
Samtang, gidayeg ni PDEA Regional Director III Bryan B. Babang ang mga operatiba nga nanguna sa operasyon ug iyang gipasiugda pag-usab ang padayong kampanya sa ahensya batok sa ilegal nga droga sa rehiyon.