Nadakpan ang usa ka 39-anyos nga babaye human gipatuman sa mga awtoridad ang warrant of arrest batok kaniya sa Mabini Street, Old Market, Barangay Poblacion 6, Cotabato City niadtong Agosto 13, 2026.
Giila ang suspek sa alyas nga Maria, 39-anyos, self-employed, ug residente sa Purok Islam, Mother Barangay Poblacion, Cotabato City.
Gipahigayon ang operasyon pasado alas-2:10 sa hapon sa tracker team sa City Intelligence Unit sa Cotabato City Police Office, uban sa mga personnel sa Police Station 4 ug Cotabato City Mobile Force Company.
Ang warrant gi-isyu ni Hon. Angelito Vencer Rasalan, Acting Presiding Judge sa Municipal Trial Court in Cities, 12th Judicial Region, Cotabato City, niadtong Agosto 12, 2026.
Konektado kini sa kaso sa paglapas sa Article 308 sa Revised Penal Code o Theft, ubos sa Criminal Case No. 19761, diin adunay girekomendar nga piyansa nga P30,000.