BUTUAN CITY – Gikumpirma ni Technical Sergeant (TSgt) Norlejan Palima sa 4th Civil Military Operations kon CMO ‘Kasaligan’ Battalion nga padayong gigukod sa kasundaluhan ang uban pang mga rebeldeng New People’s Army kon NPA nga misibat human ang engkwentro sa kabukiran sa Barangay Bakingking, Esperanza, Agusan del Sur, kagahapong adlawa nga mikalas og tulo ka mga rebelde.
Sa eksklusibong pakighinabi sa Bombo Radyo Butuan, gipadayag sa opisyal nga natigayon ang engkwentro pasado alas-5:00 sa kaadlawon dihang nakasugat sa mga miyembro sa maong grupo ang mga sakop sa 1st Squad, Charlie Company, 26th Infantry Battalion, nga gipangulohan ni 2LT Arcia, samtang nagpahigayon og joint military operations sa kabukiran sa maong barangay.
Atol sa clearing operation, usa ka lalaking casualty ang unang narekober samtang sa follow-up operation, tulo na ka mga patay’ng lawas ang narekober sa operating team, lakip ang usa ka alyas “Rheda.”