Giturn-over ang mga consumable materials ug kagamitan alang sa mga estudyante nga nagkuha og Technical-Vocational-Livelihood (TVL) track isip suporta sa ilang School-Based Skills Training Program sa nagkalain-laing tulunghaan sa syudad sa Tagum nga gisugdan niadtong Septyembre 22, 2026.
Sa unang adlaw sa turnover, gipanghatag ang food-related consumables nga naglangkob sa perishable ug non-perishable items nga gamiton sa praktikal nga pagbansay sa mga estudyante. Lakip usab sa giturn-over ang mga equipment alang sa School Hanas nga magsugod sa Oktubre, sama sa griller, chopping boards, ug uban pang kagamitan nga gikinahanglan sa pagluto.
Mikabat sa 148 ka estudyante ang identified beneficiaries gikan sa Pipisan Maug Elementary School, Laureta Elementary School, ug Tagum National Trade School, gawas pa sa mga Grade 11 ug Grade 12 students sa Jose Tuason Jr. Memorial National High School. Sa kinatibuk-an, mikabat sa ₱519,866.91 ang kantidad sa mga consumables nga giturn-over alang sa Cookery ug Dressmaking.
Gitambongan usab nila Councilor Uloy Ong, Councilor Ciara Uy-Salazar, Councilor Rex Jasper Aala, ug Councilor Wes Caasi ang maong turnover isip suporta sa programa nga naghatag og dugang nga oportunidad sa mga estudyante nga mapalambo ang ilang praktikal nga kahanas.
Ang maong turnover kabahin sa inisyatiba ni Mayor Rey T. Uy, pinaagi sa Programang Pang-Edukasyon nga nagtumong sa pagtubag sa mga panginahanglan sa edukasyon pinaagi sa paghatag sa mga estudyante sa gikinahanglang consumables ug kagamitan aron mapalambo ang ilang hands-on learning, practical skills, ug kahandam alang sa ilang umaabot nga pagtuon ug panginabuhian.