Angol ang usa ka 33-anyos nga babaye human mabangga ang gimanehong motorsiklo sa laing motorsiklo sa Diversion Road, Sitio Kalagutay, Purok 3, Barangay Base Camp, Maramag, Bukidnon, niadtong milabay’ng adlaw.
Base sa inisyal nga imbestigasyon sa Maramag Municipal Police Station, gikan sa Maraymaray, Don Carlos paingon sa San Miguel, Maramag ang pula nga Yamaha TMX nga gimaneho sa 23-anyos nga lalaki, samtang padulong sa Don Carlos gikan sa North Poblacion, Maramag ang gimanehong motorsiklo sa babaye.
Matud pa sa kapulisan, nagpadayon sa hustong lane ang unang motorsiklo sa dihang giingong misulod sa maong lane ang ikaduhang motorsiklo, hinungdan nga nagbangga ang atubangang bahin sa duha ka sakyanan.
Tungod sa kakusog sa impact, natumba sa dalan ang babayeng drayber ug nakaangkon og grabeng mga samad.
Gidala dayon kini sa rescue team ngadto sa BPH sa Maramag alang sa medikal nga pagtambal.
Gidala ug gisiguro sa barangay hall sa Barangay Base Camp ang duha ka motorsiklo alang sa hustong pagdumala. Gibutyag usab sa inisyal nga report nga walay lisensiya sa pagmaneho ang babayeng drayber, samtang adunay balidong propesyonal nga lisensiya ang 23-anyos nga lalaki.
Source: Bombo Radyo Bukidnon