Patay ang usa ka personnel sa Philippine Coast Guard (PCG) samtang samdan ang usa pa human sila gipusil sa duha ka wala pa mailhing suspek sa Roman Vilo Street, Poblacion 6, Cotabato City, niadtong Huwebes sa udto, Oktubre 22.
Giila ang namatay nga si alyas Rey, nga naka-assign sa PCG Cotabato City Station. Gidala siya sa Cotabato Regional and Medical Center (CRMC), apan gideklarar nga dead on arrival. Samtang, samdan ang iyang kauban nga si alyas John human maigo sa bala sa wala nga bahin sa ulo ug padayon nga gitambalan sa maong ospital.
Base sa inisyal nga report sa kapulisan, sakay ang mga biktima sa maroon nga Toyota Innova ug padulong unta sa ilang estasyon dihang gipusil sila sa mga suspek mga alas-12:28 sa udto. Gipusil sa mga kriminal ang duha ka kilid sa sakyanan gamit ang armas nga gituohang kalibre 9mm, base sa pito ka basyo sa bala nga narekober sa lugar.
Wala masamdi si alyas Mark ug anaa karon sa kustodiya sa Police Station 1 alang sa dugang nga imbestigasyon.
Ang mga suspek gihulagway nga duha ka lalaki nga nagsul-ob og itom nga sinina ug maskara. Nikalagiw sila sakay sa itom nga motorsiklo nga Honda XRM.
Nagpadayon ang follow-up operations sa kapulisan, lakip ang crime scene processing ug pagkuha sa mga CCTV footage, aron mailhan ug madakpan ang mga responsable sa maong krimen.
Source: StarFM Cotabato