Nasakmit sa mga kapulisan ang usa ka closed van nga kargado og mga puslit nga yosi, nga nagkantidad og gibanabanang ₱15.7 milyon, atol sa gihimong checkpoint operation sa Baliwasan Seaside sayong kabuntagon niadtong Miyerkules, Oktubre 28, 2026.
Nadakpan usab ang 54-anyos nga drayber sa maong sakyanan nga si alyas “Rabar”, residente sa 26-R Baliwasan Grande, Zamboanga City.
Sumala sa report, nakadawat una og impormasyon ang mga intelligence personnel bahin sa usa ka puti ug pilak nga Isuzu Elf closed van nga gikatahoang nagkarga og mga ilegal nga produkto. Ang sakyanan adunay plaka nga MCJ 940.
Alas 1:27 sa kaadlawon miabot ang maong van sa checkpoint. Gihangyo sa mga pulis ang drayber nga ipakita ang iyang lisensya ug ang Official Receipt and Certificate of Registration (OR/CR) sa sakyanan.
Matod pa sa drayber, pinauga nga isda ang sulod sa cargo compartment. Apan, wala siya makapakita og cargo manifest o dokumento nga nagpamatuod sa klase ug gigikanan sa iyang kargamento.
Sa pagtugot sa drayber, giablihan sa mga awtoridad ang likod nga bahin sa van ug nakita ang mga kahon sa mga sigarilyong gituohang kontrabando. Wala usab makapakita ang suspek sa mga gikinahanglang dokumento nga magpamatuod sa legal nga gigikanan sa mga produkto sa tabako.
Tungod niini, gidakop ang drayber ug gikompiskar ang sakyanan lakip ang mga nasakmit nga sigarilyo.
Padayon nga giproseso sa PNP ang maong insidente aron matino ang sunod nga mga lakang subay sa nagpatuman nga balaod.