Mainitong gidawat ni Moro Islamic Liberation Front (MILF) Central Committee Chairman ug United Bangsamoro Justice Party (UBJP) President Al Haj Murad Ebrahim ang delegasyon nga gipangulohan ni Irish Ambassador to the Philippines Emma Hickey atol sa ilang tigom sa MILF-CC Guest House, Camp Darapanan niadtong Nobyembre 9, 2026.
Lakip sa delegasyon si Monica McWilliams, usa ka akademiko ug kanhi miyembro sa Legislative Assembly of Northern Ireland, uban ang mga representante sa Conciliation Resources ug Irish Embassy.
Gihisgutan sa maong panagpulong ang pagkaparehas sa kasaysayan sa pakigbisog sa katawhang Irish alang sa kagawasan ug sa dugay nang pangandoy sa mga Bangsamoro alang sa kaugalingong pagbuot o self-determination.
Gipasiugda usab ang mga sakripisyo, kalisdanan, ug mga hagit nga giagian sa duha ka katawhan sa ilang tagsa-tagsa ka pakigbisog alang sa kagawasan ug pag-ila sa ilang identidad.
Samtang, nagpahayag si Ambassador Hickey sa iyang kabalaka kalabot sa pagpadayon sa usapang pangkalinaw ug hingpit nga pagpatuman sa Comprehensive Agreement on the Bangsamoro (CAB).
Mitubag si Chairman Murad nga gikinahanglan ang padayon, matinud-anon, ug patas nga paningkamot sa MILF ug sa Gobyerno sa Pilipinas aron matuman ang mga kasabutan.
Gipasiugda niya nga ang malampusong pagpatuman sa kasabutan responsibilidad sa duha ka partido nga nagkinahanglan og lig-on nga baruganan, political will, ug pagtuman sa mga gikasabutan.
Sa pagtapos sa panagpulong, gipamatuod pag-usab ang makasaysayanon ug politikal nga relasyon tali sa Ireland ug Bangsamoro, ilabina sa ilang komon nga pangandoy alang sa kaugalingong pagbuot, pag-ila sa identidad, ug hustisya batok sa nangaging pagpangdaogdaog ug diskriminasyon.
Gipasiugda usab sa dayalogo nga ang malungtarong kalinaw makab-ot lamang pinaagi sa hustisya, tinuod nga pag-ila, ug pagtahod sa lehitimong pangandoy sa matag katawhan.