Usa ka dakong garbo alang sa siyudad sa Tagum ang pagpasidungog sa Department of Health (DOH) Region XI ngadto sa City Health Office (CHO) atol sa pagpahigayon sa Pasidungog 2026 kaniadtong Nobyembre 6, 2026 sa Davao City.
Gihatagan og pag-ila ang Tagum ubos sa mosunod nga mga kategorya:
Indak sa Pangkalusugan (Gold Awardee) isip pag-ila sa talagsaong pagpangulo ug maayong pagdumala, lakip na ang malampusong pagpatuman sa nagkadaiyang programa sa panglawas nga dakog natampo sa pagpauswag sa kahimsog ug kaayohan sa katawhan.
Indak Tanglaw– isip pag-ila sa talagsaong kalampusan sa Local Health Systems Scorecard, nga nagpakita sa lig-on nga dedikasyon ug pasalig sa pagpalig-on sa Universal Health Care ug pagpauswag sa kalidad sa serbisyo panglawas alang sa komunidad.
Lakip sa mga pag-ila ang P300,000.00 nga cash prize, nga gamiton isip dugang pondo alang sa pagpalig-on ug pagpauswag sa mga serbisyo panglawas sa siyudad.
Kini nga kalampusan pamatuod sa padayong dedikasyon ug paningkamot sa Lokal nga Pangagamhanan sa Tagum aron masiguro ang maayong panglawas sa matag Tagumenyo pinaagi sa epektibong mga programa ug inisyatibo alang sa kaayohan sa tibuok katawhan.