Gipalapdan sa usa ka programa sa Bangsamoro Autonomous Region in Muslim Mindanao (BARMM) ang mga oportunidad alang sa mga kababayen-an aron makabaton og kaugalingong panginabuhian ug mahimong aktibong kaabag sa pagpalambo sa ilang mga komunidad.

Pinaagi sa Community-Based Enterprise Development Training for Women Entrepreneurs, gihatagan ang mga partisipante og kahibalo ug praktikal nga kahanas sa pagtukod ug pagdumala sa negosyo, ingon man sa pagpalambo sa ilang kapasidad sa pagpangulo ug pag-apil sa mga kalihokan sa komunidad.

Gipangunahan sa Nonviolent Peaceforce ang maong programa sa pakigtambayayong sa Gobyerno sa Japan, United Nations Population Fund (UNFPA), ug Ministry of Trade, Investments, and Tourism (MTIT)-BARMM. Matod ni Jonathan Combis, project coordinator sa Nonviolent Peaceforce, importante nga mahatagan og igong oportunidad ug suporta ang mga kababayen-an, ilabina kadtong naggikan sa mga sektor nga mas nanginahanglan niini, aron mapauswag ang ilang kahimtang sa ekonomiya.

Gilauman nga pinaagi sa mga inisyatiba sama niini, mas daghang kababayen-an ang makabaton og kapasidad sa pagdumala sa kaugalingong negosyo, pag-apil sa mga proseso sa pagdesisyon, ug mahimong instrumento sa positibong kausaban ug kalamboan sa ilang mga komunidad.

By Shaider

Leave a Reply

Your email address will not be published. Required fields are marked *