Wala nay armadong grupo sa New People’s Army (NPA) nga naglihok sa tibuok lalawigan sa Bukidnon ug padulong na kini sa deklarasyon nga insurgency-free pinaagi sa Stable Internal Peace and Security (SIPS) status, sumala kang 8th Infantry Battalion Commander Lieutenant Colonel Jeorge Jallorina.
Matod kang LtCol. Jallorina, wala nay recruitment o pagpundok pag-usab sa mga rebelde base sa ilang intelligence report ug padayon ang pagbungkag sa North Central Mindanao Regional Committee, apan hugot gihapon nilang gibantayan ang mga hilit nga dapit batok sa white area operations ug posibleng pagpanakop sa mga sektor sama sa kabatan-onang Lumad.
Gipalig-on usab sa 8th IB ang pakig-alayon sa mga local government unit, simbahan sama sa Diocese of Malaybalay, ug mga stakeholder samtang nag-abag sa mga programa sa panginabuhian sama sa pagpananom og kape sa mga Higaonon sa Impasugong ug sa CAA-Kigduyog nga immersion sa kabarangayan.
Gipahibalo usab ni LtCol. Jallorina nga nagpadayon ang regular nga recruitment sa Philippine Army pinaagi sa online registration ug eksaminasyon sa Army Recruitment Office sa Patag, Cagayan de Oro City, alang sa mga gustong mosulod sa serbisyo militar.
Source: Bombo Radyo Bukidnon