Sikop ang usa ka barangay kagawad ug bodyguard niini human makuhanan og daghang armas ug bala sulod sa balay sa opisyal atol sa search warrant operation nga gihimo sa mga otoridad niadtong Pebrero 25, 2026 sa Lambayong, Sultan Kudarat.
Gi-ila sa PNP Criminal Investigation and Detection Group (CIDG) Sultan Kudarat Provincial Field Unit 12, ang duha ka suspek nga si alyas “Fred”, kagawad sa Brgy. Palumbi, ug iyang gwardya nga si alyas “Tonio”, parehong residente sa maong lugar.
Narekober sa maong operasyon ang Bushmaster M16 rifle nga adunay scope, mga magasin ug bala, lakip ang 7.62 nga bala ug caliber .45 pistola nga puno og siyam ka bala ug nahibal-an nga wala’y maipakitang papeles sa armas ang mga suspek busa gisikop ug nag-atubang sa kaso sa paglapas sa Republic Act No. 10591 o ang Comprehensive Firearms and Ammunition Regulation Act.
Padayon ang PNP CIDG sa pagsiguro sa kahusay ug kalinaw arun makab-on ang kalamboan sa atong nasud.