Sa pakigtambayayong sa City Mayor’s Office – City Education Development Division (CMO-CEDD) ug sa DepEd Tagum City Division, gibalik pag-usab ang Project REY o ang Project Reading Empowers Youth sa siyudad sa Tagum.
Subay niini nagpahigayon og Partner’s Forum ang Lokal nga Panggamhanan kagahapong adlawa ,Pebrero 24, 2026, sa JV Ayala Hall, aron makaingganyo og partner sa programa gikan sa publiko ug pribadong sektor.
Uban sa temang “Building Futures Together Through Reading and Literacy,” tumong sa programa nga matabangan ang mga struggling readers sa mga tulunghaan, nga maalayan hangtud mahanas kini sa pagbasa.
Mitambong sa maong panagtapok sila Konsehal Ciara Isabelle Uy-Salazar ug Konsehal Rex Jasper R. Aala, Chairperson sa Committee on Education, nga mipahayag sa ilang hugot nga suporta sa mga programa sa literasiya sa lokal nga komunidad.
Ubos sa programa, gihatagan og kabug-aton ang pagpakusog sa ARAL Program Act sa DepEd aron matukod ang mas hayag ug mabungahong kaugmaon alang sa sunod nga henerasyon.
Gipasalamatan si Konsehal Salazar sa napakitag suporta sa maong programa, nga gilangkuban sa Toyota Motor Philippines Tagum, San Miguel Brewery, Papa G Dimsum House & Restaurant, JS Gaisano, Gaisano Grand Mall, Watsons Philippines, University of Southeastern Philippines – College of Teacher Education, ug uban pang partner institutions.
Sumala sa CMO-CEDD, kini mao ang unang panagtigum sa Lokal nga Panggamhanan ug sa mga kauban nga institusyon alang sa Project REY karong tuiga, nga nagtumong sa pagpalambo sa kultura sa pagbasa ug literasiya sa mga kabataang Tagumenyo, ug ginalauman nga mas mapakusgan pa ang mga inisyatibo sa maong programa karong tuiga.