Narescue ang tulo ka menor-de-edad gikan sa online sexual exploitation nga gihimo sa ilang kaugalingong inahan atol sa joint operation sa mga otoridad sa Purok Mangga, Zone 1, Barangay Tubod, Iligan City, Lanao del Norte niadtong Marso 17, 2026.
Nasayran nga ang tulo ka menor-de-edad nga na-rescue naglakip sa usa ka 12 anyos nga babaye, usa ka 2 anyos nga batang lalaki, ug usa ka 10 ka buwan gulang nga masuso.
Gidakop ang ilang inahan pinaagi sa Warrant to Search, Seize, and Examine Computer Data tungod sa paglapas sa Republic Act No. 11930 o ang Anti-Online Sexual Abuse or Exploitation of Children (OSAEC) ug Anti-Child Sexual Abuse or Exploitation Materials (CSAEM) Act.
Sumala kang Police Brigadier General Christopher Abrahano, Regional Director sa Police Regional Office 10, padayon ang pagpalig-on sa operasyon sa kapulisan aron mapugngan ug matapos ang pang-abuso batok sa kabataan. Samtang, nanawagan usab siya sa publiko nga makigtambayayong ug dayon ireport ang bisan unsang kahina-hinalang kalihokan aron mapanalipdan ang mga bata batok sa tanang matang sa pang-abuso.