Nasakmit ang gibanabana nga P41.1 milyon nga kantidad sa smuggled nga petrolyo nga misangpot sa pagdakop sa duha ka tripulante sa kadagatan sakop sa Lagonglong ug Villanueva niadtong Araw ng Kagitingan, Abril 9, 2026.
Gi-ila ang mga suspek nga sila si alyas “Rodrigo,” 71 anyos, kapitan sa Motor Tanker Coral Song, ug alyas “Raul,” 63 anyos, chief mate sa maong barko nga nag-atubang og kaso tungod sa paglapas sa Customs Modernization and Tariff Act.
Nabisto ang iligal nga kalihokan human makadawat og impormasyon ang mga otoridad bahin sa usa ka wala mailhing sakyanang pandagat nga nakaangkla sa kadagatan sa Lagonglong ug giingong patagong nagbaligya og diesel ngadto sa mga motorized nga bangka.
Sa gihimong beripikasyon, nasuta nga walay hustong marka ang barko ug wala usab kini nakig-coordinate sa Philippine Coast Guard ug Bureau of Customs. Sa boarding operation, mikuha og sample ang mga awtoridad nga gisusi ug napamatud-an nga “unmarked” ug wala moagi sa Bureau of Customs ang kargamento.
Napakyas usab ang mga tripulante sa pagpakita sa gikinahanglang dokumento sa barko ug sa karga niini, busa dayon gidakop ug nakompiska ang Motor Tanker Coral Song ug gibanabana nga 300,000 ka litro sa diesel nga nagkantidad og mga P41.1 milyon.
“At a time when fuel supply is critical, we remain firm in our commitment to prevent the entry and circulation of illegal petroleum products in the region. I urge the public to immediately report any suspicious activities or illegal fuel transactions to authorities,” matod pa ni Police Brigadier General Christopher N Abrahano, Regional Director sa Police Regional Office 10.
Tinubdan: Regional Public Information 10