Gipahigayon ang ika-3 nga Special Meeting sa City Motorela Franchising Regulatory Board (CMFRB), diin usa ka mahinungdanong kauyunan ang nakab-ot aron matubag ang epekto sa padayong pagsaka sa presyo sa lana gumikan sa krisis sa Middle East sa Abril 8, 2026.
Gipangunahan ni Councilor Ryan Jay Rosal, Chairman sa Committee on Public Transportation, Routing, and Road Safety, ang maong panagtigom diin gituki ang gipropose nga provisional fare adjustment nga gisumite sa Presidente sa Federation sa mga motorela associations, si Lucas Guzman.
Sa maong presentasyon, gipakita ni Guzman ang “fuel price brackets” isip basehan sa maong proposal. Sumala sa matrix, gipakita ang posibilidad nga mosaka ang pletehan ngadto sa P18.00 base sa kasamtangang lihok sa presyo sa gasolina.
Apan, human sa makuting deliberasyon, nakita sa komite nga bug-at ra kaayo ang maong kantidad alang sa publiko. Isip usa ka “win-win solution” aron dili usab dako ang epekto sa mga sumasakay (commuters), gi-uyunan nga himuong P16.00 na lamang ang pletehan—usa ka usbaw nga P3.00 gikan sa kasamtangang P13.00 nga base fare ubos sa Ordinance No. 73-2023.
Gipasiugda ni Konsehal Rosal nga ang maong usbaw himuong temporaryo lamang. Nagpasabot kini nga adunay mekanismo diin mahimong ibalik sa orihinal nga kantidad ang pletehan kon mogaan o mokunhod na ang presyo sa gasolina sa merkado.
Gipahinumduman usab sa komite nga magpabilin ang fare privileges alang sa Senior Citizens, Persons with Disabilities (PWDs), ug mga estudyante, lakip na ang mga elementary pupils, subay sa naglungtad nga mga balaod ug ordinansa.
Gawas sa pletehan, giuyunan usab ang sugyot ni Konsehal Rosal sa pagpahimutang og mga sistematikong alihan o terminal points. Kini gihimo aron malikayan ang “dead mileage” o ang pag-usik og gasolina sa mga drayber nga nagsige og tuyok-tuyok bisan walay pasahero. Tumong usab niini ang pagpahapsay sa dagan sa trapiko ug pagsiguro sa kaluwasan sa sentro sa dakbayan.
Kini nga rekomendasyon nakatakdang isumite ngadto sa 10th Sangguniang Panlungsod alang sa pormal nga pag-apruba ug legal nga implementasyon.
Pinaagi niini nga inisyatibo, gipakita sa lokal nga kagamhanan ubos sa liderato ni Mayor Amie G. Galario, kauban ang Sangguniang Panlungsod sa pagpangulo ni Vice Mayor Greizl Galario-Fernandez, ang ilang aktibong pagpangita og solusyon alang sa kaayohan sa tanang sektor sa Valencia City taliwala sa global nga energy crisis.
PIAD | Jay Fernandez-Ara