Malampusong gipahigayon sa City Government sa Valencia, pinaagi sa City Health Office (CHO) ug sa pakigtambayayong sa Tongantongan Southern Baptist Church Child Development Center, ang libreng Medical ug Dental Check-up alang sa mga kabataan ug mga benepisyaryo sa komunidad didto sa Barangay Tongantongan Covered Court, Valencia City, Bukidnon niadtong Hunyo 18, 2026.
Ang kalihokan kabahin sa nagpadayon nga paningkamot sa lokal nga kagamhanan ubos sa liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez, sa pagpalapad ug pagpaduol sa batakang serbisyong panglawas ngadto sa katawhan, ilabi na sa mga kabataan nga anaa sa ilang sayong yugto sa pagtubo ug pagkat-on.
Gisugdan ang programa pinaagi sa opening ceremony diin gipaabot ni Mayor Amie Galario ang iyang mensahe sa suporta ug pagdasig. Gipasiugda niya ang kamahinungdanon sa panaghiusa sa gobyerno, komunidad, ug mga institusyong relihiyoso aron masiguro nga matagaan og hustong pag-atiman sa panglawas ang matag Valenciano.
Human sa pormal nga programa, gipahigayon ang medical ug dental consultations nga gipangunahan sa mga health professionals gikan sa CHO. Lakip sa mga serbisyong gihatag ang health assessment, dental examination, pag-apod-apod sa mga bitamina, ug paghatag sa gikinahanglang mga tambal ngadto sa mga benepisyaryo.
Pinaagi niini nga inisyatiba, nagpadayon ang LGU Valencia City sa pagpalig-on sa mga programa nga nagtutok sa human development ug sa pagpalambo sa usa ka himsog, inklusibo, ug lig-on nga komunidad alang sa tanang Valenciano.
PIAD | Jay Fernandez-Ara
Photos | Paul Pasilan