Gitambongan sa mga Hotel front desk officer ang usa ka adlaw nga Basic Sign Language Training nga gipahigayon sa City Social Welfare and Development Office (CSWDO) ug Persons With Disabilities Affairs Office (PDAO), kagahapong adlawa, Hunyo 24, 2026, sa JV Ayala Hall, Tagum City, Davao del Norte.
Tumong sa maong pagbansay ang paghatag og batakang kahibalo sa sign language ngadto sa mga anaa sa hotel industry sa dakbayan aron mas mapanindot pa ang ilang pag-abi-abi sa mga hotel guest nga person with disabilities (PWD), ilabina kadtong adunay kalisdanan sa pagdungog.
Pinaagi niini, nakakat-on ang mga partisipante sa mga batakang sinyas ug pamaagi sa epektibong komunikasyon nga makatabang sa paghatag og mas inklusibo ug accessible nga serbisyo sa tanan.
Gipakita usab sa pagbansay ang importanteng papel sa sektor sa turismo ug hospitality sa pagsiguro nga ang tanang bisita, bisan unsa pa ang ilang kahimtang, makadawat og patas ug kalidad nga serbisyo samtang anaa sa siyudad.
Ang maong aktibidad kabahin gihapon sa pasiunang kalihukan alang sa pagsaulog sa 48th National Disability Rights Week, nga pagahitabuon sa umaabot nga Hulyo 17-23, 2026.
Dinhi sa Tagum, sa pagpanguna ni Mayor Rey T. Uy, ato gayud ginaduso ang usa ka inklusibong siyudad nga adunay patas nga oportunidad alang sa tanan.