Naaresto sa Criminal Investigation and Detection Group (CIDG) ang usa ka 59-anyos nga Australian national human nga giingong nakuhanan og 497 ka imported automotive batteries nga nagkantidad og gibana-banang P1.582 milyon sa Cagayan de Oro City.
Gipahigayon ang operasyon bag-ohay lang sa Barangay Iponan, diin nasakmit ang mga baterya nga, sumala sa CIDG, wala kuno mosunod sa gitakdang product quality ug safety standards.
Base sa report, importer ang naarestong Australian national ug giingong siya mismo ang aktuwal nga namaligya ug adunay kontrol sa mga nakumpiskang automotive batteries.
Gipangulohan sa CIDG Cagayan de Oro City Field Unit ug Regional Special Operations Team sa CIDG RFU 10 ang operasyon, uban ang Department of Trade and Industry-Region 10 ug uban pang police units.
May kalabotan kini sa pagpatuman sa Republic Act No. 7394 o Consumer Act of the Philippines ug Republic Act No. 4109, nga adunay mga probisyon bahin sa standardization ug inspection sa mga produkto.
Padayon pa ang hustong proseso batok sa naarestong indibidwal. Gipahinumdoman usab ang publiko nga mag-amping sa pagpalit og automotive products ug siguruha nga kini nagsunod sa gitakdang safety ug quality standards.