Andam na ang umaabot nga paglunsad sa Re-Nourishment School-based Feeding Program (SBFP) atol sa Central Kitchen Operations and Food Safety Training nga nagsugod niadtong Agosto 24 hangtod Agosto 28, 2026 sa BLT-CK Training Center, Maniki Central Elementary School, Maniki, Kapalong, Davao del Norte.
Kini usa ka inisyatiba sa Lokal nga Pangagamhanan sa Tagum, pinaagi sa Programang Pang-Edukasyon, sa pakigtambayayong sa Department of Education (DepEd) – Tagum City Schools Division. Tumong niini nga matabangan ang pagsulbad sa kagutom ug malnutrisyon sa mga batang nag-eskwela sa mga pampublikong elementarya sa syudad.
Isip pagpangandam sa programa, 30 ka mga partisipante nga gilangkuban sa mga cook ug kitchen staff, ug mga personahe gikan sa LGU ug Schools Division, ang miapil sa usa ka semana nga pagbansay.
Gipangulohan ang maong training nila Mercy M. Dela Cruz, RN, EDL, SBFP Busog, Lusog, Talino Central Kitchen Focal Person, ug Ma. Luisa O. Cuyos, RN, Head Nurse sa Carmen District, Davao del Norte Schools Division, nga nagtutok sa hustong pagdumala sa central kitchen, food safety, sanitation, ug pag-andam sa masustansyang pagkaon alang sa mga estudyante.
Gikatakdang ipahigayon ang dry run sa programa gikan Septiyembre 20 hangtod Oktubre 2, 2026, isip kabahin sa pagpangandam alang sa hapsay nga implementasyon sa Re-Nourishment School-based Feeding Program sa syudad.