Miabot na sa Cotabato City ang mga opisyal nga balota nga gamiton sa 1st Bangsamoro Autonomous Region for Muslim Mindanao (BARMM) Parliamentary Elections nga gitakdang ipahigayon sa Setyembre 14, 2026.
Ang mga balota gitagana alang sa nagkalain-laing polling center sa siyudad ug pormal nang gidawat sa Office of the City Treasurer niadtong Biyernes. Agosto 28, 2026.
Human kini madawat, temporaryong gibutang ang mga election materials sa maong opisina samtang gihulat ang gitakdang pag-apod-apod niini ngadto sa mga polling center.
Aduna usab kini’y tukmang label aron dali nga mailhan kung asa nga polling center gitagana ang matag balota ug election material.
Padayon usab ang koordinasyon sa mga hingtungdan nga opisina aron masiguro ang seguridad, hustong accounting, ug maayong pag-atiman sa mga balota hangtod sa adlaw sa eleksyon.
Samtang nagkaduol ang 1st BARMM Parliamentary Election, gilauman nga ipadayon ug palig-onon pa ang mga lakang sa seguridad aron masiguro ang hapsay, luwas, ug matinud-anong proseso sa eleksyon.