Tingkagol ang usa ka 19-anyos nga senior high school student human giingong nag-post og mga hulga sa Facebook nga nakapahadlok sa mga estudyante ug kawani sa usa ka eskwelahan sa Mambajao, Camiguin, takna 8:00 sa gabii niadtong Agosto 27, 2026.
Nahibal-an nga nakadawat og report ang Mambajao Municipal Police Station bahin sa umano’y mga nagbabantang post gikan sa usa ka Facebook account.
Lakip sa maong mga post ang giingong hulga sa pagpangsamad ug pagpamusil sulod sa eskwelahan.
Dali nga milihok ang mga pulis ug nagpahigayon og beripikasyon ug cyber investigation aron mailhan ang tawo nga anaa sa luyo sa maong account.
Wala magdugay, nakit-an ug nakumpirma sa mga awtoridad ang pagkatawo sa giingong naghimo sa mga post.
Matod sa Camiguin PNP, giangkon umano sa suspek, atubangan sa iyang ginikanan, nga siya ang naghimo sa maong mga post.
Online nga Pagpanghulga, puweding pasakaan ug kaso!
Pahimangno sa mga awtoridad: Dili binuang ang pagpanghulga sa social media.
Ang mga post nga gihimo isip binuang, tungod sa kasuko, o aron lamang manghadlok mahimong mosangpot sa pananagutang legal, ilabina kung nakapahinabo kini og kahadlok o alarma sa publiko ug kung sakop sa mga kinahanglanon sa nagpatuman nga balaod.
Busa, sa dili pa mopindot og “Post,” hunahunaa una pag-ayo.
Usa ka mensahe online, mahimong mosangpot sa seryosong problema sa balaod!