Naluwas ang usa ka duha ka bulan nga bag-ong himugso tungod sa dali ug paspas nga responde sa usa ka Iliganon Cop sa Barangay Suarez, Iligan City, Lanao del Norte niadtong Mayo 13, 2026.
Gi-ila ang hero cop nga si Patrolman James Michael Teves nga naka-assign sa Iligan City Police Station 2.
Base sa report, alas 12:58 sa kaadlawon samtang naka-duty ang pulis sa ilang police post sa Barangay Hall sa Suarez, kalit nga mihunong ang usa ka motorsiklo ug nangayo og tabang ang amahan sa maong baby nga nagkupot sa iyang anak nga lisod na kaayo og ginhawa ug halos dili na molihok human matuk-an.
Tungod sa iyang kahibalo sa medical response training, gidali niini nga gisusi ni Patrolman Teves ang kahimtang sa baby ug bisan og nakulbaan siya tungod kay duha pa lamang kini ka bulan, dali niyang gihimo ang first aid procedures lakip ang back blows aron matangtang ang nakabara sa agianan sa hangin sa bata.
Human sa pipila ka segundo, mihilak pag-usab ug nakaginhawa ang maong baby — timailhan nga malampuson ang gihimong pagresponde sa pulis.
Samtang naghulat sa ambulansya, gibutang una sa pulis ang masuso sa recovery position aron masiguro ang kaluwasan niini.
Gidayig sa publiko ang maong gibuhat sa kabayanihan ni Patrolman Teves, sa pagluwas ug garbo sa Iliganon ang iyang nahimo nga bisan tuod sa uban, gamay nga tabang apan nakaluwas iyang kaalam sa usa ka kinabuhi sa maong baby.