Nasamdan ang usa ka 41-anyos nga lalaki human giingong gisulayan og patay sa usa ka suspek sa Brgy. Biaba Damag, Marawi City, mga alas-6:30 sa gabii niadtong Hunyo 3, 2026.
Giila ang biktima sa alyas nga Ansary, minyo, drayber, ug residente sa Brgy. Payawan, Baloi, Lanao del Norte.
Sumala sa report sa Marawi City Police Station (MCPS), nakadawat sila og tawag gikan sa usa ka concerned citizen mga alas-6:58 sa gabii kalabot sa nahitabong kagubot sa maong lugar. Dihang nakadawat sa report, dayon mitubag ang mga pulis ubos sa pagpanguna ni PLTCOL Muhiddin G. Pagayawan, Chief of Police, alas-7:00 sa gabii ug miabot sa lugar alas-7:06 sa gabii.
Pag-abot sa mga awtoridad, ilang nakit-an ang biktima nga adunay samad sa ulo. Gidala dayon siya sa Amai Pakpak Medical Center (APMC) aron matambalan.
Base sa inisyal nga imbestigasyon, may kalabotan kuno ang insidente sa miaging panaglalis tali sa suspek ug sa mga bayaw sa biktima nga nailhang Huss ug Padi.
Migawas sa imbestigasyon nga giingong gisulong sa suspek ang duha ka managsoon sa Iligan City niaging bulan tungod sa isyu nga may kalabotan sa giingong dili angay nga relasyon sa asawa ni Huss.
Nasayran usab nga gipangita sa suspek sila Huss ug Padi aron makabalos apan wala niya kini matag-i. Hinuon, sa dihang nakita niya si Ansary, nga bayaw sa duha, giingong gihampak niya kini sa ulo gamit ang kalibre .45 nga pusil ug gipusil makausa. Wala hinuoy maigo sa bala ang biktima.
Human sa insidente, mikalagiw ang suspek nga si Mokamad uban sa tulo pa ka wala mailhing lalaki sakay sa puting Toyota Hilux nga walay plaka padulong sa wala pa matino nga direksyon.
Diha-diha dayong gilunsad sa mga awtoridad ang hot pursuit operation aron madakpan ang mga suspek.
Narekober sa lugar sa insidente ang usa ka basiyo sa kalibre .45 nga pusil ug usa ka deformed slug nga gituohang gikan usab sa maong armas.
Padayon karon ang imbestigasyon sa Marawi CPS ug ang case build-up alang sa pagsang-at sa angayng mga kaso batok sa mga suspek nga nagpabiling nagpalayo pa sa mga awtoridad.
Source: StarFM Cotobato