Nailhan na sa mga awtoridad ang suspek sa pagpamusil nga miresulta sa kamatayon sa usa ka babaye sa Barangay Bulalo, Sultan Kudarat, Maguindanao del Norte, kagabii, Hunyo 3, 2026.
Ang biktima giila nga si Sadia Talib Upam, hamtong nga edad ug residente sa Barangay Macaguiling sa maong lungsod.
Matod ni PLTCOL Esmael Madin, hepe sa Sultan Kudarat Municipal Police Station, gilayon nilang gipahigayon ang manhunt operation aron matultolan ug madakpan ang suspek.
Samtang, nakarekober ang Scene of the Crime Operatives (SOCO) og tulo ka basiyo sa bala sa lugar nga nahitaboan sa insidente, nga mahimong kabahin sa ebidensya sa kaso.
Dugang pa sa opisyal, nailhan na sa kapulisan ang suspek ug nagpadayon ang hot pursuit operation alang sa iyang dayong pagdakop.
Usa sa mga anggulong gisusi sa mga imbestigador mao ang posibilidad nga kawat ang motibo sa krimen.
Base sa pahayag sa anak sa biktima, adunay gidalang P200,000 nga kuwarta ang iyang inahan sa wala pa ang insidente, nga gikan kuno sa pagbaligya sa ilang balay.
Nanawagan usab si PLTCOL Madin sa suspek nga mosurender na lamang ug atubangon ang kasong iyang giatubang samtang nagpadayon ang operasyon sa mga awtoridad.
Source: StarFM Cotabato