Walo ka mga graduates gikan sa nagkalain-laing unibersidad sa Mindanao ang nakasulod sa Top 10 sa June 2026 Licensure Examination for Architects, sumala sa Professional Regulation Commission (PRC) niadtong Biyernes, Hunyo 26, 2026.
Nanguna sa maong kalampusan si Eloisa Marie Tan Plana sa University of the Philippines (UP) Mindanao, nga maoy nakakuha sa Rank 1 uban ang talagsaong marka nga 90.60%.
Nakakuha usab ang UP Mindanao og duha pa ka pwesto sa Top 10 pinaagi nila Joash John Montealegre, nga nakab-ot ang Rank 7 uban sa 88.40%, ug Glynry Tubidan, nga nakakuha sa Rank 9 uban sa 88.20%.
Misidlak usab ang ubang mga institusyon sa Mindanao. Si Krystyn Isabelle Remedios sa Notre Dame of Dadiangas University Inc. nakakuha sa Rank 3 uban sa 89.10% nga marka.
Samtang, ang University of Mindanao (UM) ug Mapúa Malayan Colleges Mindanao (MMCM) nagpakita usab og maayong performance. Si Katrina Isabel Muriel Templa sa UM ug si Jessie Jave Wahing sa MMCM nagtabla sa Rank 4, nga parehong nakakuha og 89.00%. Gisundan sila ni Khurtz Herbert Gatus sa MMCM sa Rank 5 uban sa 88.60%, samtang si Chriza Maye Peñaflor sa UM nakasiguro sa Rank 8 pinaagi sa 88.30% nga marka.
Ang maong kalampusan nagpakita sa taas nga kalidad sa edukasyon ug kahusayan sa mga eskwelahan sa Mindanao sa natad sa arkitektura, ug naghatag og dungog dili lamang sa ilang mga institusyon kondili usab sa tibuok rehiyon.