Pormal nga gisaulog sa Dakbayan sa Valencia ang International Day Against Drug Abuse and Illicit Trafficking (IDADAIT) niadtong Hunyo 29, 2026 sa Robinsons Valencia City, Bukidnon isip kabahin sa padayon nga kampanya batok sa ilegal nga droga ubos sa tema nga, “World Drug Problem: Persisting Issues, New Challenges, Innovative Responses.”
Gipangulohan ang maong kalihokan sa Anti-Illegal Drugs and Substance Abuse Division (AIDSAD) ubos ni Giovanni C. Asis, sa pakigtambayayong sa Valencia City Youth Development Office (VCYDO) ubos ni Francis Oliver Awiten, RN, MGA, pinaagi sa lig-on nga suporta ni Mayor Amie G. Galario ug ni Vice Mayor Greizl Galario-Fernandez kauban ang Sangguniang Panlungsod.
Gisugdan ang selebrasyon pinaagi sa Painting Competition nga nagtugot sa mga partisipante sa pagpahayag sa ilang suporta sa usa ka drug-free nga komunidad.
Gisundan kini sa usa ka programa, diin nagtigom ang mga representante sa mga nasudnong ahensya sa gobyerno, lokal nga panggamhanan, mga eskwelahan, organisasyon sa kabatan-onan, mga opisyal sa Sangguniang Kabataan gikan sa 31 ka barangay, ug uban pang mga kaabag sa kampanya batok sa ilegal nga droga.
Naghatag og welcome remarks si City Local Government Operations Officer (CLGOO) Jan Eric L. Manasan, MGA, samtang ang inspirational message gipahayag ni Kurt James Remulta, LPT, nga nagrepresenta sa opisina ni Vice Mayor Galario-Fernandez.
Tumong sa maong selebrasyon nga mapalig-on ang kaamgohan batok sa ilegal nga droga ug ipasiugda ang usa ka himsog ug drug-free nga komunidad, ilabina alang sa mga kabatan-onan.
Lakip sa mga kalihokan ang Drug Awareness Symposium nga gipangunahan ni Jason Paul Butron, ICAP I, RC, diin gipasabot ang kasamtangang mga hagit nga dala sa ilegal nga droga, ang kamahinungdanon sa preventive education, ug ang hiniusang papel sa komunidad sa pagtukod og luwas ug himsog nga Dakbayan sa Valencia.
Gipahigayon usab ang Modern Dance Contest, diin gipakita sa mga kabatan-onan pinaagi sa sayaw ang ilang adbokasiya batok sa ilegal nga droga ug ang importansya sa himsog nga panginabuhi, nga nagpalig-on sa padayon nga paningkamot sa City Government ug sa mga kaabag niini sa pagpasiugda sa edukasyon, partisipasyon sa komunidad, ug pag-ugmad sa responsableng kabatan-onan.
PIAD | Jessa Heroche & AIDSAD
Photos: Carl Tradz