Gipahigayon sa mga miyembro sa Agusan del Norte Police Provincial Office ang ilang panaghiusa ug maayong relasyon sa komunidad pinaagi sa usa ka Community Outreach Program ubos sa liderato ni Police Colonel Ruel M. Cagape, Acting Provincial Director, isip kabahin sa pagsaulog sa ika-31 Police Community Relations (PCR) Month sa Sitio Zapanta Valley, Barangay Bangayan, Kitcharao, Agusan del Norte niadtong Hulyo 14, 2026.
Nahibal-an nga naghatag ug serbisyo ang kapulisan sama sa libreng gupit, pagtambal batok sa kuto, magic show, mascot show nga naghatag ug ka bibo labi na sa mga bata, feeding program, libreng medikal ug dental nga konsultasyon, pag-apod-apod og food packs, ug libreng tambal ngadto sa mga residente.
Samtang, ang Rotary Club of Midtown Butuan, ubos sa pagpanguna ni Ms. Marites Salise, mipanghatag usab og mga wheelchair ngadto sa mga kwalipikadong benepisyaryo.
Kining matang sa kalihokan usa ka pamatuod sa padayon nga pagpakig-uban sa kapulisan ngadto sa katawhan aron mapalig-on ang bayanihan, panaghiusa, ug panagtinabangay sa komunidad, ilabina sa mga sektor nga labing nanginahanglan og suporta.