Usa ka 50-anyos nga negosyante nga giila nga High-Value Individual (HVI) sa ilegal nga droga ang nadakpan sa gipahigayon nga search operation sa hiniusang pwersa sa Philippine National Police (PNP) ug Philippine Drug Enforcement Agency (PDEA) sa Barangay Poblacion, Pikit, Cotabato niadtong Hulyo 20.
Gipahigayon ang operasyon pinaagi sa search warrant tungod sa giingong paglapas sa Republic Act 9165 o Comprehensive Dangerous Drugs Act of 2002.
Atol sa operasyon, nasakmit sa mga operatiba ang 14 ka sachet sa gituohang shabu nga motimbang og 15 gramos ug gibanabana nga nagkantidad og P102,000. Dugang pa niini, narekober usab sulod sa balay sa suspek ang upat ka armas nga gilangkuban sa tulo ka pistola ug usa ka CZ858 rifle.
Matod ni Cotabato Police Provincial Director Police Colonel Ramel B. Hojilla, resulta sa lig-on nga koordinasyon tali sa PNP ug PDEA ang malampusong operasyon batok sa ilegal nga droga.
Nabilanggo na ang suspek samtang giandam ang mga kaso nga ipasaka batok kaniya. Padayon usab ang imbestigasyon aron matino kung adunay kalambigitan ang suspek sa mas dakong operasyon sa usa ka drug network.
Source: StarFM Cotabato