Nadakpan sa hiniusang operasyon sa 601st Infantry Brigade ug 34th Infantry Battalion ang usa sa mga lider sa Panenekelan Group atol sa pagpadayon sa Decisive Military Operations sa Barangay Tukanalipao, Mamasapano, Maguindanao del Sur niadtong Hulyo 21, 2026.
Sumala kang Brigadier General Edgar L. Catu, Commander sa 601st Infantry Brigade ug Assistant Division Commander sa 6th Infantry (Kampilan) Division, ang nadakpan giila sa alyas nga “Mus,” nga giingong usa sa mga lider sa Panenekelan Group ug miyembro sa Dawlah Islamiyah-Hassan Group (DI-HG). Siya usab giingong Top 2 Regional Most Wanted Person sa Bangsamoro Autonomous Region in Muslim Mindanao (BARMM) ug giatubang ang mga kaso nga murder ug bombing.
Matud pa ni Catu, dugay nang nalambigit si alyas Mus sa mga insidente sa pagpangilkil ug uban pang kriminal nga kalihokan sa Central Mindanao. Dakong kapakyasan alang sa Panenekelan Group ang iyang pagkadakop ug nagpamatuod kini sa padayong kampanya sa militar batok sa mga armadong grupo nga nagdala og kapintasan ug kahadlok sa rehiyon.
Samtang, gipasiugda ni Major General Jose Vladimir R. Cagara, Commander sa 6th Infantry (Kampilan) Division ug Joint Task Force Central, nga ang malampusong operasyon nagpakita sa gipakusgang paningkamot sa kasundalohan batok sa mga armadong grupo nga naghulga sa kalinaw ug kahapsay sa rehiyon. Iyang gipasalig nga magpadayon ang intelligence-driven military operations sa 6th Infantry Division, uban sa ubang ahensya sa gobyerno, aron mapanalipdan ang kalinaw ug seguridad, ilabina sa umaabot nga BARMM Parliamentary Election. Gihangyo usab niya ang mga nahibiling miyembro sa armadong grupo nga mobalik sa sabakan sa gobyerno ug pilion ang dalan sa kalinaw.
Source: StarFM Cotabato