Nasakmit sa mga awtoridad ang 895 reams sa gidudahang smuggled cigarettes nga nagkantidad og P680,265.06 ug nadakpan ang usa ka suspek atol sa COMELEC checkpoint sa Barangay Daguan, Kapatagan, Lanao del Sur niadtong Hulyo 27.
Ang suspek giila nga si Abdulbasit Aiyadi Abijo, 38 anyos, minyo, ug residente sa Zamboanga City. Siya giatubang og kaso tungod sa paglapas sa Republic Act 10643 o Graphic Health Warnings Law ug Republic Act 10863 o Customs Modernization and Tariff Act.
Nasakpan ang kontrabando human gipahunong sa hiniusang pwersa sa Kapatagan Municipal Police Station, 1401st RMFB 14-A, ug 64th Infantry Battalion ang usa ka Ford Ranger nga gikan sa Picong padulong sa Parang. Nadiskobrehan sa inspeksyon ang 700 reams sa D&J Red Premium ug 195 reams sa D&J Ice Blast cigarettes nga gitago sa nagkalain-laing bahin sa sakyanan.
Gidayeg ni PRO BAR Regional Director PBGEN Christopher M. Abecia ang mga operatiba ug mipasalig nga ipadayon ang pagpahugot sa checkpoint operations batok sa smuggling ug uban pang ilegal nga kalihokan.
Source: StarFM Cotabato