Gipatuman sa Police Regional Office 12 (PRO 12), uban sa Department of Environment and Natural Resources–Mines and Geosciences Bureau Region 12 (DENR–MGB 12), ang kampanya alang sa pagpanalipod sa natural resources sa rehiyon human ipatuman ang Temporary Suspension Order batok sa mga operasyon sa small-scale mining sa Sitio Balnan, Barangay Chua, Bagumbayan, Sultan Kudarat, takna 8:30 sa buntag niadtong Agosto 7, 2026.
Gipahigayon ang hiniusang operasyon sa mga personnel sa Sultan Kudarat Provincial Police Intelligence Unit, 2nd Sultan Kudarat Provincial Mobile Force Company, DENR–MGB 12, ug Bagumbayan Municipal Police Station, subay sa Section 18 sa Republic Act No. 7076 o People’s Small-Scale Mining Act of 1991.
Sa operasyon, nasakmit ang nagkadaiyang kagamitan ug materyales nga adunay gibanabang bili nga ₱1,500,700.00.
Lakip sa mga nasakmit mao ang lima ka custom milling machines, duha ka synchronous generator sets, gibana-banang 100 gramos nga mercury, usa ka sako sa ore samples, 30 ka sako sa milled ore, usa ka blowtorch, usa ka air compressor, ug 80 ka dismantled custom milling machines.
Gipadayag sa PRO 12 nga ang hiniusang operasyon kabahin sa padayon nga paningkamot sa mga awtoridad sa pagpatuman sa mga balaod sa pagmina ug pagpanalipod sa kinaiyahan, ilabina batok sa mga operasyon nga mahimong makadaot sa natural resources sa rehiyon.