Opisyal nang giablihan alang sa publiko ang Mammography Service sa La Filipina Primary Care Facility nga nahimutang sa Prk. 3, Brgy. La Filipina, Tagum, Davao del Norte sugod adtong Agosto 14, 2026, human maaprubahan ang DOH-FDA License to Operate niini.
Maka-avail na og libre nga breast cancer screening ang mga babaye isip kabahin sa The Gift of Awareness: Mammography for Early Detection Global Grant Project, sa pakigtambayayong sa Lokal nga Pangagamhanan sa Tagum, pinaagi sa City Health Office, ug sa Rotary Club of Tagum North, Rotary Club of Tagum, ug Rotary Club of Tagum Golden L.A.C.E.S.
Personal usab nga mitambong sa pag-abli sa bag-ong Mammography Service sila Councilor Engr. Jun Coquilla ug Councilor Atty. Edd Mark Wakan, isip pagpakita sa ilang suporta sa maong proyekto.
Nagpasalamat usab si Dr. Arnel R. Florendo, Tagum City Health Officer, sa tanang organisasyon ug indibidwal nga mitabang aron matuman ug mapadayon kini nga serbisyo, nga dakong tabang ilabina sa mga babaye alang sa sayong pag-screen ug pag-detect sa breast cancer.
Padayon ang paningkamot sa LGU-Tagum, sa pagdumala ni Mayor Rey T. Uy sa paghatag og mas kombinyente, accessible, ug dekalidad nga serbisyo panglawas alang sa mga Tagumenyo.