Na-rescue ang usa ka agila nga gikatahong nasamdan sa Barangay Kibenton, Impasug-ong, Bukidnon, human kini makaplagan sa usa ka lokal nga mag-uuma.
Matud sa report sa Impasug-ong Municipal Environment and Natural Resources Office (MENRO), nakit-an ang agila nga dili na makalupad. Tungod niini, gisuspetsahan nga kini adunay injury ug nanginahanglan og medikal nga pag-atiman.
Human sa pagkadiskobre, giturn-over ang maong langgam ngadto sa Municipal Agriculture’s Office aron masiguro ang hustong pagdumala niini.
Giingon usab sa MENRO nga posible nga gikan sa palibot sa Mt. Kitanglad ang maong agila.
Tungod sa panginahanglan niini og dugang nga pag-atiman, gidala ang agila sa Provincial Veterinary Office alang sa medical assessment ug tukmang pagpanambal.
Ang maong insidente nagpahinumdom sa publiko sa importansya sa pagpanalipod sa mga wildlife ug sa ilang natural nga puy-anan. Ang dali nga pagreport ug pag-rescue sa mga nasamdan nga wildlife makatabang sa ilang rehabilitasyon ug sa pagpreserba sa biodiversity sa Bukidnon.
Gidasig usab ang mga residente nga dili pasagdan o dauton ang mga wildlife nga ilang makit-an nga nasamdan, kondili ipahibalo dayon kini sa lokal nga environmental offices o mga awtoridad nga responsable sa pag-atiman sa wildlife.